Masobra 10 ka pamilya gin-evacuate sa flash floods sa isa ka banwa sa Iloilo

ILOILO CITY – Nag-evacuate kag nagpalipas sang gab-i sa evacuation center ang 12 ka pamilya nga naapektuhan sang flash floods sa banwa sang San Erique, Iloilo.
Kasunod ini sang madasig nga pagsaka sang lebel sang tubig sa pila ka mga kabarangayan.
Suno kay Julie Paclibar, municipal disaster risk reduction and management officer sang SAn Enrique, anom ka pamilya ang apektado sa Barangay Imbang Piquenio kag nagapabilin sa simbahan sang nasambit nga barangay.
Anom man ka pamilya ang apektado sa Sitio Murubuan, Barangay Cumpo kag nagtinir sa covered gym.
Ginpangabay naman ni San Enrique ABC president Joe Fernandez sa mga pumuluyo sa kabarangayan nga malapit sa suba, nga samtang temprano kag indi pa tuman kataas ang tubig, mag-evacuate na agud indi makatuga sang daku nga halit sa ila.