ILOILO CITY – Ginbuyagyag sang jail warden sang Iloilo District Jail (IDJ) sa Barangay Nanga, Pototan, Iloilo ang ginapahayag plano sang mga preso nga magpuga.
Ginpahayag ni Jail Supt. John Montero sa interview sang Bombo Radyo nga katuyuan sang plano nga jail break nga gub-on ang iya ngalan kag mapahalin bilang jail warden.
Suno kay Montero, utok sang plano nga pagpuga ang isa sa mga kumander sang IDJ nga si Joven Abantao.
Nauntat ang iligal nga aktibidad sa presuhan suno kay Montero sang siya ang magpungko nga jail warden rason nga gusto siya pahalinon.
Si Abantao ang isa sa anom ka mga preso nga nagpositibo sa iligal nga droga sa ginpatigayon nga random drug test sang IDJ sang damlag lang.