ILOILO CITY – Patay ang seaman kag ang pakaisa sini matapos magbunggo sa Toyota Grandia ang ila ginasakyan nga motorsiklo sa atubang sang Arevalo Elementary School sa San San Jose, Arevalo, Iloilo City.
Ang mga biktima amo ang driver nga si Julius Gelvoleo, 25, nga naga-drive sang motorsiklo; kag Rampart Naldoza, 23, lunsay residente sang Cabase, Guimbal, Iloilo.
Ang driver sang van nga may plate number AAR-3732, ang ginkilala kay Nelson delos Reyes, 53, sang Poblacion Leon, Iloilo.
Suno sa utod sang driver nga si Rizal delos Reyes, pakadto sila sa Iloilo Terminal Market, apang pag-abot sang mga ini sa kurbadahon nga bahin sang San Jose, Arevalo, nasumalang nila ang nagahagunos nga motorsiklo nga ginasakyan sang mga biktima.
Naglampos sa atubang sang Grandia ang motorsiklo nga ginasakyan sang mga biktima nga amo ang gintunaan sang ila kamatayon.
Ginapahayag nga naka-inom sang makahulubog nga ilimnon ang mga sakay sang motorsiklo.