ILOILO CITY – Hugot nga ginpanginwala sang misis ni Iloilo City Mayor Jed Patrick Mabulog nga si Maria Victoria Mabilog, nga gintawag sini nga Hudas si City Councilor Jeffrey Ganzon.
Kasunod ini sang kontrobersiyal nga Facebook post ni Mrs. Mabilog nga laragway sang konsehal upod si Presidente Rodrigo Duterte.
Para kay Ganzon, siya ang ginatumod sang first lady sang Iloilo City nga nagaguba kag Mayor Mabilog sa panan-awan ni Duterte rason nga akig ang Chief Executive sa alkalde.
Sa interview sang Bombo Radyo Iloilo, ginpahayag ni Ganzon nga apisar wala direkta nga ginhingadlan, nagapati ang konsehal nga siya ang ginapabati-batian sa post ni Mrs. Mabilog.
Sa ginpalab-ot naman nga mensahe sa Bombo Radyo, ginpahayag ni Mrs. Mabilog nga ginahatagan lang sang malisya sang iban nga tawo ang pag-post niya sang laragway nanday Duterte kag Ganzon.
Napraning lang suno kay Mrs. Mabilog ang konsehal, bangud wala naman siya sang ginhambal nga Hudas ini.
Nagapati man si Mrs. Mabilog nga may nagsulsol kay Ganzon agud awayon siya.
Sa bahin sang konsehal, ginpahayag sini nga wala nila nahambalan ni Duterte ang angot kay Mabilog bangud istrikto ang panugyan sa ila sang staff sang Presidente antes ang ila pag-atubangay, nga indi pagmensyunar ang ngalan nanday Mabilog kag Sen. Franklin Drilon bangud nagakaakig ang Presidente kun mabatian ang pangalan sang duha.