ILOILO CITY – Ginapreparar na sang kampo ni Iloilo City Mayor Jed Patrick Mabilog ang ipasaka nga kaso batok sa self-confessed bag man sang Berya-Camaria Drug Group sa Negros nga si Ricky Serenio.
May kaangtanan ini sa ginpaguwa nga affidavit ni Serenio kun sa diin gin-angot sini sa illegal drug trade sa Western Visayas ang alkalde, si Sen. Franklin Drilon kag anay Liberal Party standard bearer Mar Roxas.
Ginpahayag sang spokesperson kag legal counsel ni Mabilog nga si Atty. Mark Piad sa interview sang Bombo Radyo, nga ila na ginpalab-ot sa alkalde ang mga akusasyon ni Serenio, apang wala pa ini sang sabat.
Suno kay Piad, makuha sila sang kopya sang affidavit kag ginpasiguro nga magapasaka sila sang kaso batok kay Serenio.
Kabuangan suno sa abogado ang mga akusasyon ni Serenio kag ginkuwestyon kun nga-a karon lang sini ginpaguwa ang nasambit nga mga impormasyon, apisar Enero pa sini nga tuig sang ini ang nadakpan.
Wala man sang may mapati kay Serenio suno kay Atty. Piad, bangud sang pila ka beses na sini nga pagbaliskad sang statement.
Nahibaluan nga sa iya affidavit, ginpahayag ni Sereno nga luyag nanday Drilon kag Roxas nga sudlon kag kontrolon ang illegal drug trade sa Negros kag Panay.
Suno kay Serenio, bilang Senate president sadto, may impluwensiya kuno si Drilon para kontrolon ang illegal drug trade sa Iloilo paagi kay Mayor Mabilog nga hinablos sang senador.
Ang nasambit nga impormasyon suno kay Serenio ang ginpalab-ot sa iya sang napatay nga drug lord nga si Melvin Odicta sang magkitaay sila sang Hulyo 2015.
Santu pa sa affidavit, ginpahayag ni Serenio nga gamiton nanday Drilon kag Roxas si Odicta para mauyatan ang negosyo sang iligal nga droga sa Negros.
Dugang pa ni Serenio nga ginhambalan siya ni Odicta nga marching order kuno nanday Drilon kag Roxas nga magtipon sang pondo nga gamiton sa 2016 elections.
Ginpasiguro kuno sa iya ni Odicta nga hatagan sila nanday Roxas kag Drilon sang political protection.
Ginpahayag man ni Serenio sa iya affidavit nga kahimbon sa nasambit nga plano sanday anay PNP Deputy Director for Operations Gen. Marcelo Garbo kag anay pinuno sang CIDG-Anti-Organized Crime Division S/Supt. Jose Mario Espino.