Tropa sang 82nd IB, magapabilin sa Marawi para sa rehabilitasyon

ILOILO CITY – Magapabilin pa sa Marawi ang tropa sang 82nd Infantry Battalion sang Philippine Army apisar nga natapos na ang giyera.
Sa interview sang Bombo Radyo, ginpahayag ni Lt. Col. Jayson Jumuan, commanding officer sang 82nd IB, magahatag pa sang seguridad sa Marawi ang ila tropa, samtang ginapatigayon ang rehabilitasyon.
Wala pa sang kasiguraduhan suno kay Jumuan kun san-o makabalik ang tropa sa Miag-ao kun sa diin nakabase ang 82nd IB.
Masobra na apat ka bulan ang tropa sa Marawi.
Suno kay Jumuan, masobra 400 nga miyembro sang batalyon ang yara sa Marawi.
Apat sa mga ini ang napilasan apang duha na lang sa karon ang padayon nga ginabulong sa Jamindan, Capiz.
Wala sang dapat kabalak-an suno kay Lt. Col. Jumuan bangud high morale ang mga suldado.
Mensahe pa sini sa pamilya sang mga suldado nga nabilin diri sa Iloilo, nga indi magkabalaka bangud indi na magdugay kag magabalik ang tropa sa diri sa Iloilo.