ILOILO CITY – Indi makapati ang Ilonggo fashion designer sa ginhatag nga pagsalig sa iya sang Miss Cameroon Organization agud mangin designer sang kandidata sini sa Miss Earth 2017.
Ginpahayag ni Krisanto Frias nga tumandok sang Barangay Ticud, La Paz, Iloilo City sa interview sang Bombo Radyo, overwhelmed siya sa pagsalig nga ginhatag sa iya sang nasambit nga pungsod.
Si Frias ang nag-design sang gown nga ginsuksok ni Miss Cameroon Angelie Kossinda sa long gown competition kag nag-design man sang swimsuit sang beauty queen mangin ang isuksok sini nga heroine costume kag gown sa coronation night sang Miss Earth.
Leopard print swimsuit ang ginhimo ni Frias para kay Kossinda samtang black and gold serpentina gown naman ang suksukon sini sa coronation night.
Suno kay Frias, ginpadala lang niya paagi sa Facebook ang iya designs kag masuwerte nga nagustuhan ini sang Miss Cameroon Organization.
Apisar nga libre kag iya kaugalingon nga gasto ang materyal, ginpahayag sang designer nga balewala ini para sa katumanan sang iya handum.
Walo na ka tuig nga designer si Frias kag bata pa, handum na sini makilala bilang fashion designer.
Wala maka-eskwela sa anuman nga kurso sa fashion design si Frias bangud High School lang ang tinapusan sini.
Ang hamdum, dedikasyon kag eksperyensiya ang iya nangin liyabe para makahimo sang pangalan.
Magluwas sa Miss Earth, ginpahayag ni Frias nga ginatanyag man sa iya sang Miss Cameroon Organization nga mangin designer sang mga candidates sang nasambit nga pungsod sa Miss World kag Miss Universe.