Pagtuhaw sang mga lagu sa isa ka barangay sa Iloilo City, wala sang kaangtanan sa kalalat-an – expert

ILOILO CITY – Gindula sang mga eksperto ang kahangawa sa pagtuhaw sang mga lagu sa isa ka barangay sa siyudad sang Iloilo.
Ginpahayag ni Dr. Nick Guanzon, Biology professor sa Central Philippine University, wala sang iban nga kahulugan ang pagtuhaw sang madamo nga mga lagu sa Barangay San Isidro, Jaro, Iloilo City.
Nagakahulugan ini suno kay Guanzon nga fertile ang duta sa nasambit nga lugar.
Madamo lang sang organic substance ang duta suno kay Guanzon nga makabulig sa pagtubo sang mga pananom.
Mahimo man suno kay Dr. Ganzon nga tuman ka init ang panahon rason nga nagtuhaw ang mga lagu.
Una na ginpahayag ni Punong Barangay Felix Dureza nga malab-ot sa milyon ang mga lagu nga nagtuhaw sa mga dalanon sang iya barangay.
Apang gin-athag ni Dr. Guanzon nga baliskad sa pagpati sang iban, wala sang kaangtanan sa anuman nga mga kalalat-an kaangay sang linog ang pagtuhaw sang mga lagu nga ginakahangaw-an sang mga pumuluyo sa lugar.