ILOILO CITY – Gina-verify na sang Iloilo City Police Office (ICPO) ang ginapahayag presensiya sang Special Partisan Unit (SPARU) sang New People’s Army (NPA) sa siyudad sang Iloilo.
Sa interview sang Bombo Radyo Iloilo kay ICPO director S/Supt. Henry Biñas, ginpahayag sini nga dapat anay masiguro kun lehitimo ang nasambit nga mga impormasyon.
Dugang pa sini, bastante ang puwersa sang kapulisan sa siyudad sang Iloilo para magpatuman sang seguridad.
Ginpanugyanan man sang ICPO ang publiko nga indi basta-basta magpati sa mga nagalapta nga impormasyon nga wala sang nagakaigo nga basehan kag gilayon ipahibalo sa mga otoridad kun may ma-monitor nga presensiya sang makaduluda nga grupo.