ILOILO CITY – Ginreklamo sang isa ka pulis ang abyan sini nga agi nga ginaalegar gintuyo siya nga ubahan sa sulod sang isa ka lodge sa McArthur, La Paz, Iloilo City.
Ang biktima amo si PO1 Joemon Ras Cainday, 32, sang Lopez Jaena Sur, La Paz, assigned sa Traffic Investigation Unit sang Iloilo City Police Office.
Ang suspek naman amo si Edwin Paredes Pineda Jr., 29, sang Villa Hermosa Subdivision, Baldoza, La Paz, Iloilo City kag isa ka call center agent sa Bacolod City.
Sa interview sang Bombo Radyo kay SPO2 Allain Silda, imbestigador sang La Paz Police Station, ginpahayag sini nga alas-7:00 kagab-i sang nag-inom ang mga natungdan sa Andoks sa La Paz.
Pagpatak sang alas-10:00 sang gab-i, nagdesisyon ang mga ini magtulog na lang sa Empress Palace Pension House bangud sa tuman nga kahulugbon.
Apang bangud puno na ang pension house, nagsaylo ang mga ini sa Anita Lodge sa Divinagracia St., La Paz.
Suno kay PO1 Cainday, samtang nagahigda siya sa katre, ginhurikap ini sang suspek kag gintuyo nga ubahan sang pantalon.
Sang nagpangindi ang pulis, gintayaan ini ni Pineda sang cutter sa dughan.
Diri kag nagpakuno-kuno ang pulis nga romansahon ini kag sa ulihi, ginposasan sini ang suspek.
Sang ginrikisa ni PO1 Cainday ang suspek, nakuhaan ini sang isa ka sachet sang suspected shabu.
Sa subong preso ang natungdan sa La Paz Police Station.
Nagdepensa naman si Pineda sa mga alegasyon ni PO1 Cainday.
Suno sa suspek, may mutual understanding (MU) sila sang pulis kag gindepensa nga ang pulis ang una nga naghalok kag nagromansa sa iya.
Suno sa natundgan, mismo ang pulis ang naghagad sa iya sa lodge kag lunsay kabaliskaran ang mga akusasyon batok sa iya.
Ginpanginwala man sini nga hubog siya.
Gindugang man ni Pineda nga childhood friend sila ni PO1 Cainday kag sa ulihi, ginhimo ini nga informant sang pulis tuhoy sa iya misis kag sang iya nga other woman.