ILOILO CITY – Nangin madinalag-on ang paghiwat sang Bombo Music Festival: A Song-writing Competition of Wholly Original Melody and Lyrics kagab-i sa Rose Memorial Hall sang Central Philippine university.
Nag-champion sa kompetisyon si Joseph Ponce sang Baesa, Quezon City nga nagsulat kag nagkanta sang ambahanon nga “Gusto Kong Maging”.
Si Ponce ang nagbaton sang P200,000 kag trophy.
Nangin First Runner-up naman si Jerrie Mae Ged Orgasan sang Guadalupe Nuevo, Makati City sa iya nga ambahanon nga “M.U”.
Si Orgasan ang nagbaton sang P150,000 kag trophy samtang Second Runner-up naman sa kompetisyon si Jose LG Fuentes sang Consolacion, Cebu sa iya ambahanon nga “Panumpa” kag nagbaton sang P100,000 kag trophy.
Ginkilala nga Best Interpreter si Pamela Torres nga nag-amba sang “Hanggang Kaibigan” ni Steven Nicole Pedro kag nagbaton ini sang P50,000.
Wala man sang kapiyerdihan ang iban nga finalist tungod nakabaton man ang mga ini sang P50,000 bilang consolation prize.
