ILOILO CITY – Ginpaboran sang pamilya sang isa sa mga overseas Filipino worker (OFW) nga napatay bangud sa pagmaltrato sa Kuwait, ang temporaryo nga pagpauntat sang Department of Labor and Employment (DOLE) sa pagpadala sang mga Pinoy workers sa amo nga pungsod.
Sa interview sang Bombo Radyo Iloilo, ginpahayag ni Eranez Esguerra, utod sang OFW nga si Vanessa Karissha Esguerra sang San Pablo, Batangas, dapat lang nga untaton na ang pagpadala sang OFW sa Kuwait.
Suno kay Esguerra, posible nga indi lang ang iya utod ang mabiktima sang pagmaltrato sang ila mga amo.
Kun mahimo lang suno kay Esguerra, gusto man nila matilawan sang mga Kuwaiti ang makahalanusbo nga gin-agyan sang mga Pinoy nga nagkalamatay bangud sa pagmaltrato.
Kadungan sini, nagpanawagan sang bulig ang pamilya Esguerra sa gobyerno agud madala na pauli sa Pilipinas ang bangkay sang iya utod.
Disyembre 13 sang nagligad nga tuig nasapwan ang lawas ni Vanessa nga nahigtan sa li-og kag nagasab-it sa bintana sa puluy-an sang amay sang iya amo.
Apang tubtob karon wala pa makapauli ang bangkay sini bangud wala sang ticket kag santu sa pagpakig-angot sang pamilya Esguerra sa Department of Foreign Affairs, ang agency nga nag-recruit kay Vanessa ang dapat magbakal sang ticket.
Antes nasapwan nga patay, nakapanugid sa iya pamilya si Vanessa nga gina-harass ini sang amay sang iya amo.