ILOILO CITY – Nag-abot na sa Iloilo ang replica image sang Señor Sto. Niño gikan sa Cebu, para sa Dinagyang Festival sang Iloilo.
Sa interview sang Bombo Radyo Iloilo, ginpahayag ni Fr. Reymund Alcayaga, parish priest sang San Jose Placer parish sa siyudad sang Iloilo alas-7:00 kaina sang aga sang nag-abot sa Iloilo International Airport ang imahe.
Antes gindala sa San Jose Place parish, gin-agi anay ini sa mga simbahan sa banwa sang Cabatuan, Sta. Barbara kag Pavia para sa nagahulat nga mga deboto.
Gin-agi man ang imahe sang Señor Sto. Niño sa University of San Agustin sa Sambag, Jaro, Iloilo City kag sa main campus para sa public veneration.
Emosyunal naman ang isa ka iloy nga deboto sang Sto. Niño nga nagpadulong sa simbahan sang Sta. Barbara dala ang anak nga may cerebral palsy.
Ginpahayag ni Leny Da-anoy sa Bombo Radyo, ginapangamuyo sini nga mag-ayo na ang siyam ka tuig sini nga bata.
Saksi man si Daanoy sa natuman nga mga debosyon niya sa Sto. Niño bangud madamo na siya sang ginapangayo nga natuman sa tagsa nga mag-upod siya sa religious sadsad.
Alas-3:00 sang hapon ginbalik ang imahe sa San Jose Placer parish kun sa diin nagpatigayon sang re-enactment sa pag-abot sang replica sa Iloilo, 50 ka tuig na ang nakaligad.
Nagpatigayon man sang tribute mass para kay Rev. Fr. Ambrocio Galindez nga ginakilala nga amay sang Dinagyang Festival.