ILOILO CITY – Ginkakibot ni anay Health Secretary Paulyn Jean Ubial ang ginpaguwa ni anay Health Secretary Janette Garin nga wala sila naga-intyindihanay rason nga iya ginatum-ok ang anay tiglikom sa kontrobersiya sa Dengvaxia vaccines.
Sa interview sang Bombo Radyo Iloilo, ginpahayag ni Ubial nga wala siya sang madumduman nga gin-awayan nila ni Garin.
May kaangtanan naman sa iya mga biyahe nga suno kay Garin iya ginlimitahan, ginpahayag ni Ubial nga duha ka beses sa isa ka tuig lang siya kun magbiyahe kag may pahanugot ini ni Garin.
Isa ka bes lang ang madumduman ni Ubial nga wala niya ginsunod ang mando ni Garin kag ini ang pagpanagtag sang check-up kits sa mga local government units (LGU) sadtong 2016 nga iya ginbalibaran bangud sa kahangawa nga maakusaran siya sang electioneering.
Suno kay Ubial, oustanding man ang rating nga ginhatag sa iya ni Garin sang siya ang assistant secretary sang DoH.
Dugang pa sang tiglikom, wala niya ginabasol si Garin sa iya kapaslawan nga makalusot sa Commission on Appointments (CA).
Sumugod sang nagbiya siya sa DoH, ginpahayag ni Ubial nga wala na siya sang komunikasyon sa mga tawo sa ahensiya rason nga indi niya maintyindihan kun nga-a siya ang ginabasol ni Garin nga sa likod sang expose ni Dr. Francis Cruz.