ILOILO CITY – Ginpasiguro sang Philippine National Police (PNP) ang seguridad sang mga magatambong sa Dinagyang Festival 2018 sa siyudad sang Iloilo.
Sa interview sang Bombo Radyo Iloilo, ginpahayag ni Police Regional Office 6 (PRO-6) spokesman Supt. Gilbert Gorero nga ang security plan nga ipatuman sa Dinagyang Festival ang kaangay man sa ginpatuman nga seguridad sang ginpatigayon ang Asia-Pacific Economic Cooperation (APEC) kag Association of Southeast Asian Nations (ASEAN) meetings diri sa Iloilo City, ang ipatuman sa Dinagyang.
Apang gin-athag sang kapulisan nga wala sang specific threat nga namonitor may kaangtanan sa Dinagyang Festival.
Suno kay Gorero, ginhugtan man ang seguridad sa palibot sang mga hotels kun sa diin nagatinir ang mga VIPs kag dignitaries nga maga-upod sa selebrasyon.
Samtang nagpahanumdom naman ang City Health Office sa mga merrymakers ilabi na sa mga magapadulong sa food festival sa siyudad.
Ginpahayag ni city health officer Dr. Bernard Caspe nga dapat maghalong sa mga ginakaon agud malikawan ang food poisoning.
Apang ginpasiguro ni Dr. Caspe nga ang tanan nga mga food vendors nga nagkuha sang kiosk para sa food festival ang may yara sang health card.