ILOILO CITY – Gindugok sang indi magnubo sa 6,000 ka mga tumalambong ang Handog ng Bombo Radyo at Star FM sa Dinagyang Festival 2018: Battle of the Bands kagab-i.
Halos indi mahulugan sang dagom ang plaza mayor sang Plazuela de Iloilo sa Benigno Aquino Avenue, Mandurriao, Iloilo City bangud sa mga nagsaki sa performance sang 12 ka mga banda nga nagpasakop sa Battle of the Bands.
May pila ka mga audience nga nagtindog sa kilid kag sa atubang sang palza mayor bangud lunsay puno na ang mga lamesa sa mga tawo nga nag-enjoy sa performance sang mga competing bands.
Sa umpisa tubtub sa ulihi nga band performer, wala naghalin ang mga Ilonggo nga nag-jamming sa nasambit nga aktibidad.
Nalingaw man ang mga audience sa roleta kag photo booth sang Steeltech, free sampling sang Cafe Clara El Maca sang Jimm’s Coffee, free taste sang Emperador Red kag Smirnoff Mule.
Ginkilala nga 2nd runner-up ang Tangke de Guera band nga nagbaton sang P10,000 pesos.
First runner-up ang Kamp Kawaii nga nagbaton naman sang P14,000 samtang kampeon ang Libra band gikan sa Pavia, Iloilo nga nagbaton sang P20,000.
Nagdala man pauli sang consolation prize nga P3,000 ang siyam ka mga finalists.
Nahibaluan nga magluwas sa libre nga paghatag sang kalingawan, may libre man nga T-shirt nga ginpanagtag ang Bombo Radyo.
Ang Handog ng Bombo Radyo at Star FM sa Dinagyang Festival: Battle of the Bands ang ginhimo agud ma-promote kag ma-preserve ang talento sang mga Ilonggo ilabi na sa pag-amba.