ILOILO CITY – Ginalauman sang mga dumuluong nga magasaksi sang Dinagyang Festival 2018 ang blowout nga selebrasyon kag performance sang mga competing tribes, sa ika-50 nga anibersaryo sang world-renown festival.
Suno kay Dennis Ledjford gikan sa Calgary, Canada apang nakapangasawa sang isa ka Ilongga, ika-duha na niya ini ka tuig nga magsaksi sang Dinagyang.
Espesyal ini nga okasyon suno kay Lidfors kag karon nga golden anniversary sang Dinagyang, iya ginalauman ang mas engrande nga selebrasyon.
Bangud nga nag-enjoy siya sang una niya nga pagsaksi sang Dinagyang Festival, iya man gin-imbitar ang mga hinablos nga sanday Tenessy kag Candice nga mag-upod sa ila diri sa Iloilo para makigbahin sa selebrasyon.
Ginhingalitan man sang pamilya ang kahigayunan nga makabisita sa Guimaras.
Suno kay Lidfors, nagbakal gid sila sang bantog nga paho sang Guimaras kag gindala pauli sa Iloilo.
Sa iya pagbalik-balik sa Iloilo, nakit-an ni Lidfors kun ano na ka progresibo ang siyudadkag ang Probinsiya nga dapat suno sa iya ipabugal sang mga Ilonggo.
Wala man sini ginpalampas ang pa-sample sa drume ka extro sang Bombo Radyo.
Halandumon naman para sa mag-utod nga Tenessy kag Kristin sang Calgary, Canada, ang ila una nga biyahe sa Pilipinas ilabi na diri sa Iloilo.
Suno kay Tenessy, mainabi-abihon ang mga Ilonggo kag naluyagan gid sini ang Iloilo.
Na-excite ini nga magsakay sa mga jeep diri sa Iloilo kag mangin sa tricycle.
Isa pa sa nanamian sini ang madamo nga mga pagkaon kag karon paborito na sini ang halo-halo.
Gindayaw man ni Tenessy ang katahom sang Guimaras kag ang katam-is sang paho sa probinsiya.
Suno pa kay Tenessy, kun may kahigayunan, gusto man sini magpasakop sa mango eating contest sang Manggahan Festival.
Gindayaw naman ni Kristin ang katahom sang Iloilo kag pagakama-inabyanon sang mga Ilonggo.
Nasadyahan ini sa maduagon nga mga dekorasyon karon sang siyudad kag bilang una nga kahigayunan nga makasaksi sang Dinagyang, ginapaabot sini ang mind blowing nga performance sang mga tribu sa Dominggo.
Na-enjoy man ni Kristin ang mainit nga klima diri sa Iloilo bangud nga sa Calgary, negative 26 degrees Celsius temperatura.