ILOILO CITY – Nadakpan sa lodging house sa Sto. Niño Norte, Arevalo, Iloilo City ang tatlo ka mga drug personalities sa magkatuhay nga drug buy bust operation sang Molo Police Station kag Arevalo Police Station.
Naaresto sang Molo Police Station si Michael Ledesma, 36-anyos, sang San Juan distrito sang Molo.
Nakuha gikan kay Ledesma ang 15 ka sachet sang ginapatihan shabu.
Samtang nadakpan naman sang Arevalo Police Station ang mag-utod nga Mikee Renzo Saladas, 22-anyos kag Rupelo Saladas, 18-anyos sang Rizal Estanzuela, City Proper.
Nakuha gikan sa mag-utod ang 15 ka sachet sang suspected shabu.
Ang buy-bust operation ginpatigayon sa BRB Resort nga ginapanag-iyahan ni Renita Minerva, bayaw ni Punong Barangay Diana Lyn Minerva.
Apang isa lang ang source nga ginakuhaan sang mga ini sang droga kag ini si alyas Marimar sang West Habog-Habog, Molo.
Bag-o na nga modus sang mga nagaduso sang iligal nga droga, nga patigayunon ang transaksyon sa mga lodging houses.
Sa interview sang Bombo Radyo Iloilo, ginpahayag ni PO2 Lenard Acyatan sang Arevalo Police Station nga ila man ginkakibot sang nagdungan sila sang Molo Police Station kag nag-operate man sa amo nga resort.
Mahapos nga magbaligya sa lodging house suno kay Acyatan bangud nga wala ginatsekyar ang dala kun magsulod.
Indi man basta-basta nga makasulod ang mga otoridad kun wala sang search warrant.
Ginahimo man nga drug den ang lodging house sunod sa pulis bangud diri ginapatigayon ang pot session.