ILOILO CITY – Nagkalain-lain nga alamat kag istorya sang pagpangabuhi sa mga lugar sa Western Visayas ang ginpakita sang 10 ka mga tribu nga nagpasakop sa Kasadyahan regional festival competition.
Ang defending champion nga Tribu Hubon Binagtong sang Nueva Valencia, Guimaras ginpakita paagi sa ila pagsaot, ang ginsuguran sang Guimaras.
Industriya sang bulang kag mainuswagon nga negosyo naman ang sentro sang performance sang Tribu Tinabu-ay sang Murcia, Negros Occidental.
Ang Tribu Manoghabol sang Salakayan Festival gikan sa Miag-ao, Iloilo ang nakakuha sang pinakamataas nga grado gikan sa veteran choreographer nga si Mr. Edwin Duero kag film director nga si Elvert Bañares nga nagserbe nga panel of expert sa coverage sang Bombo Radyo.
Ginpakita naman sang Tribu Banigan sang Libertad, Antique ang nagkalain-lain nga gamit sang banig kag kun paano ini ginalala.
Ang kapuslanan naman sang kawayan kag mga produkto nga human sa kawayan ang tema sang performance sang Tribu Tultugan sang Maasin, Iloilo.
Ginpakita naman sang Tribu Pantat sang Zarraga, Iloilo kun paano magpangdakop tubtob sa pagluto sang pantat.
Nahibaluan nga ang banwa sang Zarraga ang ginakabig nga pantat capital sang Iloilo.
Samtang, tuman ka damo nga ani kag pagkama-inabi-abihon naman sang mga taga-Dumangas, Iloilo ang ginpakita sang Tribu Guban Haw-as.
Pagpasalamat naman sa madamo nga ani kag ang mga kilala nga produkto sang Guimaras ang sentro sang performance sang Tribu Hubon Mangunguma gikan sa banwa sang San Lorenzo.
Madinu-agon nga costume ang ginpasundayag sang mga dancers kag wala nangin upang ang tuman ka init nga panahon sa siyudad sang Iloilo agud nga makahatag lang sang sulit nga performance para sa linibo nga tumalan-aw.
Daw kaangay naman nga nagpaindis-indis sa gingamit nga props ang kada tribu kag dala ang mga higante nga props sang sila ang nag-perform sa lima ka mga judging areas.
Bwas naman nga adlaw mahibaluan kun sin-o ang magadaog sa Kasadyahan competition.
Bwas man patigayunon ang highlight sang dinagyang festival nga Ati tribe competition, sa diin 10 man ka mga tribu ang mapa-indis indis.