ILOILO CITY – Indi tanan nga bahin sang 1987 Constitution ang dapat nga ligwaton.
Ini ang panindugan ni anay Senate President Aquilino “Nene” Pimentel, isa sa mga miyembro sang gintukod ni Presidente Rodrigo Duterte nga Consultative Committee.
Sa interview sang Bombo Radyo, ginpahayag ni Pimentel nga ang mga maayo nga provision sa Konstitusyon ang indi na dapat nga ilisan.
Lakip diri suno sa anay senador ang mga proposal nga ligwaton ang Bill of Rights kag dulaon ang Ombudsman.
Paandam pa ni Pimentel, sa ti-on nga tandugon ang isyu sa Bill of Rights, posible nga magatuga lang sang gamo sa baylo nga mag-stabilize sang pungsod.
Gin-athag man ni Pimentel nga kun ligwaton ang Konstitusyon, dapat nga may nagakaigo nga edukasyon ang mga Pilipino angot sa federalism kag indi lang bangud nga kagustuhan ni Presidente Duterte.