ILOILO CITY – Ginpanginwala ni anay Iloilo 5th District Rep. Rolex Suplico ang kahilabtanan sa nanotaran sang Ombudsman nga wala ma-liquidate nga pondo nga naglab-ot sa P14.5 million nga ginpaagi sa AARON Foundation sadtong 2007.
Sa interview sang Bombo Radyo Iloilo, ginpahayag ni Suplico nga wala ini sang ihibalo tuhoy diri kag ginpanindugan nga gingamit lang ang iya pirma.
Palaligban man diri kun nga-a wala gid sang kinalis ang mga pirma kag nagapati nga gin-copy and paste ini gamit ang teknolohiya.
Paathag ni Suplico, congressman pa ini sadto kag nalakip sa oposisyon gani wala ini sang pork barrel.
Tuhoy naman sa ginapahayag Technical Livelihood Research Center nga nangin benepisyaro sang pondo, wala ini sang labot diri tungod nga yara ini sa lehislatura kag indi sa Executive Department.
Hulaton na gid lamang sini ang kopya halin sa Ombudsman agud pormal nga madihon ang sabat.