ILOILO CITY – Nakuha sang first timer nga Hubon Mangunguma sang Manggahan sang San Lorenzo, Guimaras ang kampeonato sa Kasadyahan Regional Cultural Contest sang Dinagyang Festival 2018.
Gindala pauli sang Hubon Mangunguma ang P200,000 nga grand prize kalakip sang trophy.
Magluwas nga grand champion sa regional Kasadyahan, nakuha man sang Hubon Mangunguma ang Best in Choreography kag nangin Best Choreographer naman si Rommel Flogen, amo man ang Best in Performance.
Samtang sa minor awards, Best in Street Dance ang Tribu Pantat sang Zarraga, Iloilo; Best in Music kag Best Musical Director ang Tribu Tultugan sang Maasin, kag Best in Costume ang Tribu Kaing sang Leon, Iloilo.
Sa major awards, ginkilala bilang 4th Runner-up kag nagdala pauli sang P100,000 kag trophy ang Hubon Binagtong sang Manggahan sang Nueva Valencia, Guimaras; 3rd Runner-up ang Tribu Kaing sang Leon, Iloilo nga may premyo nga P125,000 kag trophy; 2nd Runner-up ang Tribu Pantat sang Zarraga, Iloilo nga may P150,000 kag trophy kag 1st Runner-up ang Tribu Manughabol kang Salakayan Festival sang Miag-ao, Iloilo.