ILOILO CITY – Nabawi sang Tribu Panayanon sang Iloilo City National high School sa Distrito sang Molo ang kampeonato sa Ati tribes Competition sa ika-50 ka tuig sang Dinagyang Festival.
Magluwas nga grand Champion nga may P250,000 nga premyo kag trophy, nakuha man sang Tribu Panayanon ang lima ka mga minor awards nga ginalakipan sang Best in Choreogrphy, Best in Choreographer si Rommel Flogen, Best in Music kag Best Musical Director, kag ang Best in Performance.
Nangin makahalawat-hawat naman ang away sa minor awards sa tunga sang first runner-up nga Tribu Salognon sang Jaro National High School kag Tribu Panayanon sa diin apat sa minor awards ang nakuha sang Tribu Salognon nga ginalakipan sang Best Costume Designer, Best Costume, Best in Discipline kag Best in Street Dancing.
Nahibaluan nga ang Tribu Salognon amo ang nagkampeon sang nagligad nga tuig.
Samtang nakuha naman sang Tribu Paghidaet ang Best in Head Dress award.
Sa major awards, 4th runner-up ang Tribu Dagatnon sang Ramon Avanceña National High School nga gindala pauli ang P125,000 kag trophy, 3rd runner-up ang Tribu Paghidaet sang La Paz National High School nga nagdala pauli sang 150 thousand pesos kag trophy, kag 2nd runner-up ang Tribu Ilonganon sang Jalandoni Memorial National High School sa La Paz nga nakabaton sang P175,000.