ILOILO CITY – Ginkakibot sang himata diri sa Iloilo, sang consignee sa P6.4 billion shabu shipment nga si Eirene Mae Tatad nga nadakpan sa banwa sang Janiuay, Iloilo sang nakaligad nga semana.
Sa eksklusibo nga interview sang Bombo Radyo Iloilo sa tiya ni Tatad nga ginhinago lang ang pangalan, wala sila sang ideya nga consignee sa shipment sang iligal nga droga nga nakalusot sa Bureau of Customs ang iya hinablos.
Suno pa sa tiya, subong lang nila nahibaluan nga nagatrabaho si Tatad sa Customs bangud labandera lang ini sadto.
Wala man sila sang ihibalo suno sa tiya, nga naulamid ang iya hinablos sa iligal nga droga bangud sang nag-abot ini sa ila sadtong enero 27, wala man sang may ginhambal si Tatad.
Nakibot man sila suno sa tiya sang nag-abot ang National Bureau of Investigation nga amo ang nagkuha kay Tatad sa banwa sang Janiuay agud dal-on ini sa Manila, matapos nga gindagdagan sang arrest warrant.
Ginakasubo niya suno sa tiya nga naulamid sa dako nga iskandalo ang iya hinablos, apang nagapati nga gingamit lang ang ngalan ni Tatad.
Simple lang suno sa tiya ang pangabuhi sang iya hinablos kag wala ini sang kwarta sang nagbakasyon sa ila.