ILOILO CITY – Nagakahangawa ang pamilya sang consignee sa P6.4 billion shabu shipment nga nakalusot sa Bureau of Customs (BoC) nga si Eirene Mae Tatad, para sa iya seguridad.
Sa exclusive interview sang Bombo Radyo Iloilo kay Nedy Agustino Tatad, iloy ni Eirene Mae, iya ginpahayag nga tuman ang nerbyos nga nabatyagan sini tagsa nga magtambong sa imbestigasyon sang Senado ang iya anak.
Bangud sa pagka-consignee sang iya bata, nabutang sa ital-ital ang kabuhi sini suno kay Mrs. Tatad.
Gin-athag naman sang iloy nga indi magarbo ang pangabuhi sang iya anak apisar nga consignee ini.
Ginpanindugan ni Mrs. Tatad nga hgin-gamit lang ang pirma sang iya bata agud makalusot ang iligal nga droga sa BoC.
Suno kay Mrs. Tatad, ginpeke sang broker nga si mark Taguba ang pirma sang iya bata kag gingamit nga wala sang pahanugot.
Isa ka bulan pa lang suno kay Mrs. Tatad nga na-accredit si Eirene Mae bilang consignee ukon nagabaton sang shipment kun sa diin kompleto man ang mga papeles sini lakip na ang registration sa Bureau of Internal Revenue.