ILOILO CITY – Ginkabig sang Overseas Workers Welfare Administration (OWWA) nga “extraordinary” ang kamatayon sang Ilongga OFW sa Kuwait nga si Joanna Daniela Dimafelis sang Barangay Ferraris, Sara, Iloilo.
Sa interview sang Bombo Radyo Iloilo, ginpahayag ni OWWA Region 6 case welfare officer Jack Arroyo, nga may motibo ang employer sa pagpatay sa Pinay worker.
Pamatuod diri suno sa opisyal ang pagtago kay Dimafelis sa freezer agud indi makita.
Sa karon suno kay Arroyo, ginahulat pa sang OWWA ang resulta sang autopsy examination sa bangkay ni Dimafelis agud matumod kun ginpatay ang biktima antes nga gintago sa freezer.
Ginpasiguro naman sang OWWA ang bulig agud maangkon ang hustisya sa kamatayon ni Dimafelis.
Nagpamalibad naman ang pamilya nga magpadulong sa Kuwait agud sugaton ang bangkay ni Joanna.