ILOILO CITY – Suspended ang klase sa madamo nga mga banwa sa probinsiya sang Iloilo bangud sang mga pag-ulan nga dulot sang bagyo Basyang.
Kagab-i pa lang gin-anunsyo na ni City Administrator Atty. Hernando Galvez nga wala sang klase sa pre-school tubtob elementarya sa pampubliko kag pribado nga buluthuan sa Iloilo City.
Suspendido naman ang klase sa tanan nga level sa bug-os nga probinsiya sang Guimaras.
Sa probinsiya sang Iloilo, wala sang klase sa tanan nga level sa mga banwa sang San Enrique, Dumangas, Barotac Viejo, Pavia, Alimodian, Zarraga, New Lucena, Miag-ao kag Leganes.
Suspendido ang klase sa elementary sa Passic City samtang wala naman sang klase sa pre-school kag elementary level sa banwa sang San Miguel, Dingle, Pototan, San Dionisio, Tigbauan kag Maasin sa probinsiya sang Iloilo.
Nag-awas naman ang suba sa banwa sang San Enrique kun sa diin duha ka balay ang ginsulod sang tubig baha.
Samtang wala naman ginpahanugutan sang Philippine Coast Guard ang mga Ro-Ro, fast craft kag mangin ang mga sakayan nga gikan sa Iloilo padulong sa Bacolod.
May biyahe naman sang mga sakayan gikan sa Iloilo padulong sa Guimaras.