ILOILO – Nagpahanumdom ang Simbahan Katoliko sa mga deboto nga hatagan pagtamod ang ispiritwal nga aspeto subong nga Ash Wednesday apisar sang pagsaulog sang Valentine’s Day.
Sa interview sang Bombo Radyo Iloilo, ginpahayag ni Monsignor Meliton Oso sang Jaro Archdiocesan Social Action Center, nga ang Ash Wednesday ang panugod sa pagpanghanda sang Simbahan sa pinakadako nga Paskwa, ang Paskwa sang Pagkabanhaw sang Diyos.
Suno kay Monsignor Oso, ang pagbutang sang abo sa agtang ang pahanumdom nga nahatagan lang kabilinggan ang kabuhi sang tawo bangud sa pagpalangga sang Diyos.
Gin-athag naman ni Oso nga wala ginadumilian sang Simbahan ang pagpakita sang paghigugma subong nga adlaw sang tagipusuon.
Apang kun mahimo suno sa pari nga punggan anay ang dutan-on nga mga huyog kag mag-angkon sang disiplina ilabi na sa pagkaon, kag magbulig sa nagakinahanglan.
Pahanumdom pa ni Monsignor Oso, ang tawo indi lang bodily kag sexual being kundi isa man ka spiritual being.