Napatay sa tuman nga pagkastigo ang Ilongga OFW nga si Joanna Daniela Dimafelis sang Barangay Ferraris, Sara, Iloilo nga nasapwan sa sulod sang freezer sa abandonado nga apartment sa Kuwait.
Ini ang nagguwa sa autopsy examination sa bangkay sang biktima.
Suno kay Ambassador Renato Pedro Villa, nag-angkon sang bali nga gusok ang biktima, mga contusion kag trauma sa pelvis kag kidney area.
Nagaguwa man suno kay Villa nga nag-angkon pa gid sang internal bleeding si Dimafelis.
Nagaguwa man sa autopsy report nga patay na ang biktima sang ini ang ginsulod sa freezer.
Agud makaluwas sa ila salabton suno kay Villa, gin-report pa sang mga amo ni Dimafelis nga nagpalagyo ang Ilongga sa ila paghinakop, antes ang mga ini nagbiya sa apartment.
Sa karon nagapadayon ang pag-ayam sang otoridad sa lalaki nga isa ka Lebanese kag asawa nga Syrian nga amo ang mga primary suspect sa kamatayon sang biktima.
Natalana naman nga dal-on diri sa Pilipinas ang bangkay ni Dimafelis buwas nga adlaw, Pebrero 16.