Probinsiya sang Iloilo magahatag sang bulig, 'moment of silence' ginhalad para kay Joanna Demafelis

ILOILO CITY – Magahatag man sang bulig pinansiyal ang probinsiya sang Iloilo para sa pamilya sang Pinay worker nga ginpatay sang iya mga amo sa Kuwait kag ginsulod pa sa freezer.
Nagalab-ot sa P100,000 ang igahatag nga bulig sang probinsiya sang Iloilo, para sa pagpalubong kay Joanna Daniela Demafelis sang Barangay Ferraris, Sara, Iloilo.
Buwas nga adlaw natalana ihatag sa pamilya Demafelis ang nasambit nga kantidad.
Samtang kadungan sang flag ceremony kaina sang aga, naghalad sang moment of silence ang mga empleyado sang Iloilo Provincial Capitol sa pagpanguna ni Governor Arthur Defensor Sr.
Ini ang para kay Demafelis kag kadungan sini ang pangamuyo nga makuha sang pamilya sa labing madali nga panahon ang hustisya para sa ginpatay nga Ilongga OFW.
Ginkondena sang probinsiya sang Iloilo ang brutal nga pagpatay kay Demafelis nga napatay sa tuman nga kastigo sang iya mga amo antes ini gintago sa freezer.