ILOILO CITY – Nagapabilin sa mga evacuation centers ang kapin 300 ka mga residente nga nawad-an sang puluy-an sa sunog sa Zone 12, Calaparan, Arevalo, Iloilo City.
Sa interview sang Bombo Radyo Iloilo kay Punong Barangay Cecilia Nava, ginpahayag sini nga nagtulog sa karton ang mga nasunugan bangud wala sang mga beddings.
Ang napabayaan nga uling ang ginatudlo nga ginhalinan sang sunog nga naglamon sang 62 ka mga pamalay.
Samtang emosyunal naman nga ginpakigbahin sa Bombo Radyo sang isa ka survivor nga kumpol ang tiil, kun paano ini nakaluwas sa sunog.
Suno kay Joffrey Robles, nagkamang ini gikan sa iya nagadaba-daba nga balay padulong sa dagat.
Nabilin ni Robles ang iya nga crutches sa sulod sang iya puluy-an bagud sang panic.
Nagasalom lang si Robles sa dagat sa ti-on nga may maglupad nga mga aliparok gikan sa sunog.