ILOILO CITY – Indi makasalbar sa mga pulitiko nga yara sa narco list ni Presidente Rodrigo Duterte, ang pagsaylo sang mga ini sa partido administrasyon na PDP-Laban.
Ini ang matigdas nga ginbuy-an sang presidente, matapos mahibaluan nga may mga alkalde sa probinsiya sang Iloilo nga sadto yara sa iya listahan sang drug personalities, apang nakasumpa na sa PDP-Laban, kaangay nanday Mayor Mariano Malones sang Maasin, Iloilo kag Mayor Alex Centena sang Calinog, Iloilo.
Suno sa presidete, wala pa sini malantaw ang iya listahan kun nalimpyuhan na ang pangalan sang nasambit nga mga alkalde.
Apang kun mapamatud-an nga may kahilabtanan gid man ang mga ini sa iligal nga droga, pasensyahanay na lang suno sa presidente, apang indi ang mga ini masalbar sang ila partido.