ILOILO CITY – Ginpanindugan sang Department of Agriculture (DA) nga rice sufficient ang pungsod kag sobra ang produksyon sang bugas.
Apang gin-ako ni Agriculture Sec. Emmanuel Piñol nga indi ini mabatyagan sang ordinaryo nga mga pumuluyo bangud mataas gihapon ang presyo sang bugas sa merkado.
Suno sa tiglikom, indi sa supply ang problema kundi sa supply system kag ang labi nga apektado sini amo ang mga kunsumidor.
Bangud sini, magadihon sang mekanismo ang ahensiya agud madula na ang mga middlemen kag traders.
Ginpahayag sang tiglikom nga gikan sa mga mangunguma, dapat nga diretso na sa mga balaligyaan ang bugas kag indi na mag-agi sa mga middleman kag traders agud masiguro ang barato nga presyo sang bugas.
Nakibot ang tiglikom nga P33.00 pa ang presyo sang bugas sa Iloilo bangud sa Metro Manila nagalab-ot na sa P60.00 ang kilos sang bugas.