ILOILO CITY – Nagasamo ang emosyon sang pamilya Demafelis matapos madakpan na ang amo ni Joanna Daniela Demafelis, ang Ilongga OFW nga ginpatay sa Kuwait kag ginsulod pa sa freezer.
Sa interview sang Bombo Radyo Iloilo, ginpahayag ni Barangay Kagawad Pablo Demafelis, tiyo ni Joanna, sa Bombo Radyo nila una nabatian nga nadakpan na si Nader Essam Assaf, isa ka Lebanese.
Suno kay Demafelis, nagapasalamat siya nga nadakpan na ang suspek.
Malipayon sila sa development sa kaso apang nagapangibabaw gihapon ang kaakig sa mga responsable sa pagpatay sa iya hinablos.
Nadakpan sang Interpol si Assaf sa Lebanon kag karon yara na sa kustodiya sang nasambit nga pungsod.
At large naman karon ang asawa sini nga si Mona Hassoun, nga ginapatihan nagapanago sa Syria.
Una na ginpasiguro ni Presidente Rodrigo Duterte sa pamilya Demafelis nga hatagan hustisya ang kamatayon ni Joanna.