ILOILO CITY – Wala magtambong bisan isa sa mga opisyal sang siyudad sang Iloilo sa public hearing sang Metro Iloilo Water District (MIWD).
Ini ang may kaangtanan sa P4.10 per cubic meter nga ginaduso sang MIWD nga saka sa sukot sa ila mga konsumidor.
Sa ti-on nga maaprubahan, mahimo na P20.00 kada cubic meter ang sukot sang MIWD sa mga konsumidor.
Apang sa interview sang Bombo Radyo, ginpahayag ni MIWD general manager Imelda Magsusi nga wala nagpadala sang tiglawas ang siyudad apisar nga ila gin-imbitar.
Suno kay Magsusi, nagpadala sila sang sulat kay Mayor Jose Espinosa III agud ipahibalo ang tuhoy sa public hearing.
Suno pa kay Magsusi, ginbalhag man nila sa pamantalaan kag nagpahamtang sang notice sa mga pampubliko nga lugar, angot sa public hearing.
Samtang nagtambong naman ang mga kunsumidor kag wala sang may nagpamalabag sa rate increase suno sa MIWD.