ILOILO CITY – Nagtukod na sang task force ang Department of Interior and Local Government (DILG) nga amo ang maga-imbestigar sa salabton sang mga local kag regional officials sa Western Visayas sa problema karon sa Boracay.
Sa interview sang Bombo Radyo Iloilo, ginpahayag ni DILG Assistant Secretary Epimaco Densing III nga subong nga hapon iga-determina kun sin-o ang magabug-os sang nasambit nga task force nga iya ginapamunuan.
Suno kay Densing, indi siya magkuha sang mga opisyal gikan sa Rehiyon 6 nga magabug-os sa task force agud masiguro nga wala sang bias kag mangin independent ang task force.
Posible suno kay Densing nga may kahilabtanan man ang mga opisyal sa Western Visayas sa problema karon sa Boracay.
Nagapanguna nga trabaho sang task force ang magpatigayon sang case buildup batok sa mga lokal nga opisyal.
Ginpahayag ni Asec. Densing nga makuha sila sang ebidensiya kun nga-a ginpahanugutan ang mga iligal nga istruktura kag paano nahatagan sang permit ang pila ka tag-iya sang resort apisar wala sang Environmental Compliance Certificate (ECC), kag kun diin na nagkadto ang environmental fee nga ginasukot sa mga turista.
Suno sa opisyal, magadugay sang isa ka bulan ang case buildup batok sa mga opisyal nga may kahilabtanan sa ginakabig sini human induced disaster sa Boracay.