ILOILO CITY – Talakayon na sa maabot nga Cabinet meeting ang ginaduso nga pagpaidalom sa Boracay sa state of calamity bangud sang polusyon sa isla.
Sa interview sang Bombo Radyo Iloilo, ginpahayag ni Department of Interior and Local Government (DILG) Assistant Secretary Epimaco Densing III nga igaprisintar sa Cabinet meeting sa Marso 5 ang proposal, apang una na ini gintalakay sang technical working group sa meeting sa Boracay sang nagligad nga semana upod ang Department of Tourism (DoT) kag Department of Environment and Natural Resources (DENR).
Suno sa opisyal, ginpaboran sang DoT ang proposal nga state of calamity para sa Boracay, samtang nagaduha-duha naman diri ang DENR.
Yara na sa kamot ni Presidente Rodrigo Duterte suno kay Densing, kun aprubahan ang deklarasyon sang state of calamity.
Panindugan ni Densing, kinahanglan nga ipaidalom sa state of calamity ang Boracay agud mapadali ang bidding kag procurement process sa rehabilitasyon sang isla.
Ginpaboran man sang Department of Tourism ang ginaduso nga temporaryo nga pagpasirado sang isla sang Boracay sumugod sa bulan sang Hunyo.
Sa pagkamatuod suno sa opisyal, ginalauman na nila nga kun matapos na ang rehabilitasyon sang isla, doble ang magadagsa nga turista bangud madamo ang nalangkag nga makita ang ginbag-o sang Boracay.