ILOILO CITY – Ginsipa sa serbisyo ang lima ka pulis sa siyudad sang Iloilo.
Lakip sa mga gindagdagan sang dismissal order amo sanday SPO1 Dante F. Sison, PO3 Alexis A. Jutis, PO2 Dinaree C. Sia, PO1 Milbert Niño kag PO1 Rodel Paulan, mga anay miyembro sang City Anti-Illegal Drugs Special Operations Task Group (CAIDSOTG).
Napamatbatan ang mga ini nga guilty sa kaso nga grave misconduct matapos nga ginapahayag ila gin-abduct ang menor-de-edad sa Molo, Iloilo City sadtong 2014 kag pilit ginpa-ako sa pagkawat sang armas ni PO3 Jutis apang sang ulihi natukiban nga nadula sang pulis ang armas sini bangud sang tuman nga kahulugbon.
Magluwas sa mga miyembro sang Iloilo City Police Office (ICPO), ginsipa man sa serbisyo ang duha ka pulis gikan sa Negros Occidental nga sanday PO1 Limuel Paparon nga napatay na, kag PO1 Nick Acaya, bangud sang grave misconduct.
Suno kay Napolcom-6 director Atty. Joseph Celes, nagalab-ot na sa siyam ka mga pulis gikan sa Police Regional Office 6 ang na-dismiss sa serbisyo subong lang nga tuig nga ginalakipan sang duha ka mga opisyal kag pito ka police non-commissioned officers.