ILOILO CITY – Nagpaandam ang pila ka mga eksperto sa posibilidad nga maguba ang institusyon sang Korte Suprema kag ang constitutional democracy sa pungsod bangud sang nagakatabo subong sa Supreme Court.
Sa interview sang Bombo Radyo Iloilo, ginpahayag sang abogado kag isa man ka law expert nga si Atty. Hector Teodosio sa ti-on nga maguba ang institusyon sang ika-tatlo nga branch sang gobyerno, pungsod ang maga-antos.
Kasunod ini sang kaangay nga paghimbon sang mga justices sang Korte Suprema agud mapahalin si Chief Justice Ma. Lourdes Sereno.
Nagatuga man sang pangduha-duha sa mga desisyon sang Supreme Court suno kay Teodosio, ang indi pag-intyindihanay sang mga justices.
Bangud nga napun-an sang pulitika, indi malikawan suno sa abogado nga madudahan ang mga desisyon sang Korte Suprema sa pila ka kontrobersiyal nga kaso kag kuwestyunon ini kun nabase sa layi ukon sa personal nga interes.
