ILOILO CITY – Wait and see ang Task Force Boracay kun desisyunan karon sa Cabinet meeting ang ila ginaduso nga temporarryo ipasirado ang Boracay sa mga turista para sa rehabilitasyon.
Sa interview sang Bombo Radyo Iloilo, ginpahayag ni Department of Interior and Local Government (DILG) Assistant Secretary Epimaco Densing III nga amo man ang chairman sang Task Force Boracay, lakip sa agenda sa Cabinet meeting ang isyu sang Boracay.
Apang indi pa masiguro sang opisyal kun gilayon nga magdesisyon si Presidente Rodrigo Duterte.
Luyag ni DILG Secretary Eduardo Año nga gilayon mapasirado ang Boracay samtang ginaduso naman ni Tourism Sec. Wanda Teo nga sa monsoon season na lang ipasirado ang Boracay.
Apang kun sa Hunyo pa suno kay Densing, padayon nga maguba ang isla kag ang pagpatukod sang mga iligal nga istruktura.
Ginarespeto naman sang task force ang opinyon ni Department of Environment and Natural Resources (DENR) Secretary Roy Cimatu nga nagapamatok sa pagpasirado sang Boracay.
Apang kinahanglan suno kay Asec. Densing nga ma-audit ang drainage sa Boracay kun sa diin kinahanglan nga bakbakon ang mga dalan agud makita ang illegal connection sa drainage rason nga ila ginaduso ang pagpasirado sang isla.