ILOILO CITY – Ginapangita na sang mga otoridad ang punong barangay sang Libertad, Lapuz, Iloilo City nga nagpanapote sang isa ka media practitioner sa Hotel del Rio, Molo, Iloilo City.
Ginpahayag sa Bombo Radyo Iloilo ni Hervert Vego, columnist sang Panay News, nakibot sila nga samtang nagapangape siya sa nasambit nga hotel kaina sang aga, nagsulod si Punong Barangay Sumakwel Nava kag siya ang ginsapote.
Magluwas sa tapungol, ginpahayag ni Vego nga ginhabuyan pa ini sang punong barangay sang malain nga mga tinaga kag gin-alegar nga nagtuyo pa mag-gabot sang armas si Nava.
Suno sa kolumnista, wala sila sang away ni Nava gani nakibot ini sa akto sang barangay official.
Paathag naman ni Iloilo City Councilor Plaridel Nava, akig ang iya amay nga punong barangay kay Vego bangud wala ini magbayad sang utang.
Ginpahayag sang konsehal nga suod nga mag-abyan ang iya amay kag ang kolumnista apang wala magtuman si Vego sa pangako nga magbayad sang utang.