ILOILO CITY – Ginbalikan sang kampo ni anay Iloilo City Mayor Jed Patrick Mabilog si Presidente Rodrigo Duterte kasunod sang pamahog sini nga patyon si Mabilog sa ti-on nga magbalik sa Pilipinas.
Sa interview sang Bombo Radyo Iloilo sa ti-ayon ni Mabilog nga si Maria Victoria “Marivic” Mabilog, ginpahayag sini nga indi salapakon ang pamahog ni Duterte nga ginlaragway sini nga isa ka buang.
Apang wala sila nagakampante bangud suno sa kampo sang anay alkalde, indi mapaktan ang paminsaron sang isa ka buang nga presidente sa diin sarang ini nga makapatay sang tawo.
Pila sa mga rason suno kay Mrs. Mabilog sa masami nga paglaslas ni Duterte sa iya bana amo nga wala pa ini maka-move on sa natabo nga 2016 elections sa diin ginkamasaan ini sa siyudad sang lloilo kag pagkahisa sini bangud ginkilala nga World Mayor ang iya bana.
Tubtub subong suno kay Mrs. Mabilog, wala man napamatud-an ni Presidente Duterte nga isa ka narco-politician ang anay alkalde sa diin lunsay lang pato-pato ang iya nga ginahimo.
Una na gintawag ni Presidente Duterte si Mabilog nga drug protector kag nalakip ini sa listahan sang PNP, Philippine Army kag Philippine Navy sa mga personalidad nga may kaangtanan sa iligal nga droga.
Ginhingadlan man sang presidente ang siyudad sang Iloilo nga “most shabulized city” kag “bedrock of illegal drugs”.
Nagapati man si Mrs. Mabilog nga indi sila pagpabay-an sang Diyos kag padayon sila nga nagapakapag-on.