Malacañang ginhangkat si ex-Mayor Mabilog nga magpauli sa Phl kun wala sang sala
ILOILO CITY – Ginhangkat ni Presidential Spokesman Harry Roque si anay Iloilo City Mayor Jed Patrick Mabilog nga magpauli sa Pilipinas.
Suno kay Roque sa press briefing sa Alimodian, Iloilo, kun malimpyo ang konsensiya ni Mabilog, mapauli ini sa pungsod kag diri depensahan ang kaugalingon.
Ang pagpanago suno kay Roque ang “evidence of guilt”.
Gin-athag man sang Palasyo nga wala sang personal nga kaakig si Presidente Rodrigo Duterte kay Mabilog.
Una na gintumod ni Duterte si Mabilog nga drug protector kag yara sa drug list sang PNP kag militar ang pangalan sang anay alkalde.
Samtang indi na luyag patulan sang Malacañang ang pahayag sang misis sang anay alkalde nga si Ma. Victoria Mabilog nga gintawag nga buang ang presidente kasunod sang pamahog nga patyon si anay Mayor Mabilog.
Pahayag ni roque, wala siya nagasabat sa mga tawo nga indi salapakon kag isa na diri si Mrs. Mabilog.