ILOILO CITY – Nagserbe nga inspirasyon sang top notcher sa Philippine Military Academy (PMA) Alab-Tala Class 2018 nga si 1st Cadet Jaywardene Hontoria sang Barangay Balabag, Pavia, Iloilo ang kapigaduhon sang kabuhi agud magtinguha kag malab-ot ang kadalag-an.
Sa exclusive interview sang Bombo Radyo Iloilo, ginpahayag ni Hontoria nga nagdako siya sa talamnan kun sa diin bata pa lang siya nahibaluan niya nga ang mga ulubrahon sa bukid bangud nga masami siya upod sang iya amay.
Temprano pa siya nga nakamuklat sa reyalidad suno kay Hontoria nga kun pigado kinahanglan magtinguha agud makatibawas.
Dugang pa sini, sa PMA na-develop ang iya karakter kag ginapreparar sa pag-deploy sa field bilang mga suldado.
Ang mabudlay sa isa ka kadete sang PMA suno kay Hontoria nga kun dululungan maghatag sang requirements kun sa diin ginatilawan kun paano nila balansehon ang obligasyon.
Bata pa lang, achiever na si 1st Cadet Hontoria kun sa diin sumugod elementarya tubtob High School, nagtapos ini nga valedictorian.
Isa man ka registered nurse si Hontoria apang bata pa lang, handum na sini ang mangin suldado rason nga ginpadayon sini ang pagsulod sa PMA matapos nakapasar sa 2013 Nursing Licensure Examination.