ILOILO CITY – Ginpasiguro sang Task Force Boracay nga may Plan B para sa mga maapektuhan sa pagpasirado sang isla sang Boracay, ilabi na ang mga mawad-an sang trabaho.
Sa interview sang Bombo Radyo, ginpahayag ni DILG Assistant Secretary Epimaco Densing III nga amo man ang chairman sang task force, may obligasyon ang mga employers ukon resort owners nga hatagan gihapon sang trabaho ang ila regular nga mga empleyado sa ti-on nga magbalik ang operasyon sang isla.
Mahimo man i-hire para magtrabaho sa rehabilitasyon nga patigayunon sa isla, ang iban nga mga mawad-an sang palangitan-an.
Samtang sirado ang isla, magahatag man sang libre nga training ang Department of Tourism (DoT) para sa mga frontliners nga nagatrabaho sa mga resort sa Boracay.
Dugang pa ni Asec. Densing, magasulod man ang iban nga ahensiya sang gobyerno agud maghatag sang bulig sa mga apektado nga trabahante kaangay sang bridge financing ukon loan.
Nakapakig-angot naman ang DoT sa mga tour agencies kag operators mangin sa airline companies para sa kanselasyon sang mga bookings kag reservations sa isla sang Boracay.
Ginpahayag ni Densing nga wala sang local man ukon dumuluong nga turista nga pahanugutan nga makasulod sa Boracay sa ti-on nga mapasirado na ang isla.
Nagakahulugan ini suno sa opisyal nga apisar ang mga may advance booking ang indi na pagpahanugutan nga makasulod sa isla.
Suno sa opisyal, ginhingyo ni Tourism Secretary Wanda Teo sa mga tour operators kag airline companies nga i-reimburse ang booking sang mga turista nga wala sang penalty.
Magluwas diri, tanyagan man ang mga turista nga mag-divert na lang sa iban nga tourist destination sa pungsod.
Madamo sang lugar sa Pilipinas suno sa task force, nga mahimo kadtuan sang mga turista.