ILOILO CITY – Suguran na ang pagtukod sang Plazuela de Pavia ukon ang Plazuela 3 sang Florete Group of Companies sa Purok 2, Pavia, Iloilo.
Kaina sang aga sang ginpatigayon ang groundbreaking ceremony nga ginpangunahan sang chairman sang Florete Group of Companies nga si Dr. Rogelio Florete, Presidente kag Chief Executive Officer sang Bombo Radyo Philippines nga si Ms. Margareth Ruth C. Florete, Father Joseph Hao kag gintambungan man sang mga lokal nga opisyal sang banwa sa pagpanguna ni Mayor Michael Gorriceta.
Suno kay Dr. Florete, ang pag-uswag sang banwa kag maayo nga liderato sang mga opisyal ang nagtulod sa Florete Gorup of Companies agud dal-on sa mga pumuluyo sang Pavia ang mga amenities diri sa siyudad sang Iloilo.
Ginbalikan ni Dr. Florete ang panahon kun sa diin ginadala pa siya sang mga ginikanan sa ila nabakal nga duta sa Tigum, Pavia.
Kun sadto mga tabako kag mais ang makit-an kun magpadulong sa Pavia, sa karon suno kay Dr. Florete, madamo na sang negosyo sa amo nga banwa kag tuman na kadamo sang populasyon nga tanda sang pagtin-ad kag progreso.
Ini bangud sa maayo nga pagpadalagan sang mga opisyal sang banwa suno ka Dr. Florete.
Makatib-ong man sa ekonomiya sang banwa sang Pavia ang Plazuela de Pavia ukon Plazuela 3 suno kay Dr. Florete.
Ang buwis nga igabayad sang Plazuela ang isa ka source of income para sa banwa.
Magluwas sa Plazuela de Pavia, ginpasiguro ni Dr. Florete nga handa man ang Rural Bank of Pavia nga ginapanag-iyahan na sang Florete Group of Companies, nga maghatag sang bulig kag trabaho sa mga pumuluyo sang banwa paagi sa financing kag iban pa nga serbisyo.
Suno kay Dr. Florete, bulan sang Disyembre subong nga tuig, target nga buksan ang Plazuela de Pavia.