ILOILO CITY – Ginhangkat ni PNP chief Police Director General Ronald dela Rosa ang mangin successor kag subong National Capital Region Police Office (NCRPO) chief Oscar Albayalde nga ipadayon ang away batok sa iligal nga droga.
Sa interview sang Bombo Radyo Iloilo, ginpahayag ni Dela Rosa nga luyag sini ipadayon ni Albayalde ang iya nasuguran nga pagpapas sang illegal drugs sa pungsod.
Ginpahanumdom man sini sa incoming PNP chief nga palanggaon ang organisasyon.
Ginpabugal naman ni Dela Rosa ang mga accomplishments sa PNP kun sa diin sa iya pagpamuno suno sa PNP chief, nangin malapit ang mga pulis sa tawo.
Magluwas diri, nangin madinalag-on man suno kay Dela Rosa ang kampanya sang PNP sa iligal nga droga.
Nagpadulong sa Iloilo si Dela Rosa para sa lubong sang iya mistah nga si Brigadier General Manuel Trece Robles, anay Deputy to the Assistant Chief of Staff sang Philippine Army.
Sanday Dela Rosa kag Robles ang classmates sa Philippine Military Academy (PMA) Sinagtala Class 1986.
Kaupod man ni Dela Rosa nga nagpadulong sa Iloilo si incoming PNP chief Albayalde.