ILOILO CITY – Ginhangkat ni anay Department of Health (DoH) Secretary Janette Garin si Sen. JV Ejercito nga kun luyag limpyuhan ang Philippine Health Insurance Corporation (PhilHealth), magpatigayon ini sang audit sa ahensiya.
Sa interview sang Bombo Radyo, ginpahayag ni Garin nga dapat buksan sang senador ang mga mata sini kag indi lang pagpilion ang mga puntiryahon sini ukon “selective justice”.
Suno sa anay DoH chief, paagi sa independent audit mahibaluan ang matuod nga nagakatabo sa sulod sang PhilHealth kag ang financial status sini.
Kun luyag sang senador nga mareporma ang PhilHealth, dapat untaton suno sa senador ang fraud kag ang case rate nga sistema sang PhilHealth.
Nahibaluan nga sa idalom sang case rate, may gintalana na ang PhilHealth nga kantidad ukon package sa tagsa ka balatian.
Dugang pa ni Garin, welcome sa iya kun imbitaron siya ni Ejercito sa congressional hearing.
Gin-abi-abi man ni Garin ang pagpasaka sang PhilHealth sang kaso sa Ombudsman batok sa iya.
Kahigayunan ini suno sa anay tiglikom agud mahibaluan ang matuod nga status sang PhilHealth.