ILOILO CITY – Wala sang plano ang pamilya Garin nga mag-uyat sang renda sang panggobyerno sa probinsiya sang Iloilo.
Suno kay anay Congresswoman Janette Garin, wala gina-istoryahan sang ila pamilya ang pagpadalagan sang mga Garin bilang gobernador sa probinsiya.
Ginpahayag ni Garin nga ang importante sa ila pamilya amo nga may kapasidad ang sin-o man nga lider nga magpamuno sa Iloilo.
Nahibaluan nga si First District Congressman Richard Garin amo ang presidente sang PDP-Laban sa probinsiya sang Iloilo.
Samtang ginpanginwala man ni Congresswoman Garin nga nagapakigsapol ang mga ini kay Fourth District Congressman Ferjenil Biron para sa posible pag-updanay sang puwersa sa 2019 electioans.
Suno sa anay mamalidha, wala siya sang may nahibaluan nga gin-istoryahan sang magtimbang nga bahin ang tuhoy sa pulitika.
Apang gin-ako nga sadto, ginhambalan sila ni Biron.
Apang ang ila desisyon suno sa anay mamalidha, ang magadepende sa makasugtan sang bilog nga pamilya kag sa pagkonsulta nila sa mga pumuluyo sang first district.
Sa karon suno kay Garin, nakasentro pa sila sa mga kinahanglanon sang first district.