ILOILO CITY – Mahinay ang pagkay-o sang contractor sang mga depektibo nga units sang housing project sang National Housing Authority (NHA) para sa mga biktima sang bagyo Yolanda sa Barangay Bacjawan Sur, Concepcion, Iloilo.
Sa interview sang Bombo Radyo Iloilo, ginpahayag ni Concepcion Mayor Millard Villanueva nga magluwas sa pagkay-o sang mga sub-standard nga units nga karon gina-istaran na, nagatukod pa sang dugang nga mga units bangud wala pa makompleto ang 1,000 units sang proyekto.
Ila na nasulatan suno sa alkalde ang NHA angot sa depekto sang mga units kag ang indi estable nga pader sang pila ka mga balay.
Natukiban nga wala mabutangan sang brace ang pader rason nga mahuyang ini.
Nakalab-ot naman suno kay Mayor Villanueva sa Senado ang sub-standard nga proyekto.
Nahibaluan nga December 2017 dapat i-turnover sa local government unit (LGU) ang proyekto, apang tubtob lang sa pasalig ang National Housing Authority suno sa alkalde.